三 天南新報

1901年

1月25日　粵謳解心　佚名

心點樣歌？唱幾支歌，局勢如斯喚奈何？細想今日的凄涼究竟系誰知錯？國民心死呀，枉費你有四萬萬咁多！壓力重重來壓我，點解賤似泥沙任佢折磨？若系壓得太深就要發憤共佢來爭過，奪返民權免被佢亂苛。倘或甘心就此來居坐，恐怕外憂內亂呀更弊過地網天羅。勸君免受無窮禍，唉，須要想過，切莫牢不破，等到盤穿缽破個陣呀就怨恨當初！

1月25日　憂到冇了　佚名

憂到冇了，對住孤燈，燈呀做乜你獨力光明咁可人。眾生醉夢未知何時醒，家亡國破呀佢都詐作唔聞，怎能學得燈你種光明正，把佢地一一分明革舊鼎新！虧我漂流四海有誰尋問，地角天涯好似賣身。政府系咁樣子欺凌須要同發憤，大家合力就可眾志成城。若不擊暴除奸我輩斷斷難安穩呀，當猛省，未渴先開井，莫等到大禍臨頭個陣呀，就魄散魂驚！

1904年

1月5日　唔好咁做　佚名

唔好咁做，勸你唔好甘做，免至入了牢籠。你睇近日做官人仔有邊一個建立奇功？雖則你懿旨奉承肩任算重，當朝聲勢算你極地走紅。你日夜系咁殷勤來去運動，我睇你執迷唔醒反噲有過無功。況且今日民黨咁多人又咁擁，廣西平亂斷冇與別省咁易相同，佢接濟又近安南容乜易運送，械精糧足豈有怕你督撫王公？你籌餉至到系開捐重有何計可弄？浩繁兵費任你打算到借款都窮！你護陣雖系有咁多無一個系有用，就系老馮唔死亦都老到龍鐘。勸你換過個心肝唔好咁懵，要識嚇民權自治正是近世英雄！今日你作個同種操戈全系冇用，至使祖墳被挖呀！我問你怎樣有面目見先翁？就系他日縱使你有功今日糧餉亦無處可弄！唉！難以食俸，想落唔中用，我做你就棄官唔做咯，去做個廿世紀嘅豪雄！

1月8日　唔好守舊　佚名

唔好守舊，舊極總要想嚇回頭，回頭想過，就唔會就得咁心嬲。舍得大陸有咁樣子風潮，我亦都由得你舊。你睇翻天覆地，問你點止得住海水東流？人話世界點得件件咁新，是必有新正形得出佢系舊。點估維新撈埋守舊，真正好似水抅油。佢往日舊呢，只話系個副面口，而家積埋咁多舊毒，容乜易變了附骨疽瘤！爛銅爛鐵，日久就會生銹；咸魚霉菜，好極都怕難留。算你系鴉片煙，咁舊都唔入得斗，陳皮咁法制，咪話煮水就潤得嚨喉！大抵物理人情，都系一樣噉解究，舊日個的塵羹土飯，總要一筆來鉤！唔信你睇嚇人地國富兵強，總系從新政處著手，乾坤新造咁就雄視全球，講乜氣運使然，實在靠人事嚟湊！你若肯剔除舊弊，即刻就建起新來爭過，奪返民權免被猷。芍藥咁鮮紅，到了春殘就會開透；明珠咁照耀，太陽一出，就把夜光收！唉！真吽呌，昏庸兼及腐臭，唔在幾久，我怕塞維爾國個的慘劇，就要演出一班東亞明優！

1月9日　反解心　笑罕

今日嘅世事，總要進取為先，但求解脫未必咁就得安然。好笑個個子庸推去命蹇，佢話苦中尋樂咁就算系神仙，若果系依佢此言真正累世不淺，唔求進步反以退步為言。若使佢今日在生睇見我地黃種咁賤，瓜分祖國佢定不生憐，身做奴才佢便話牛馬更賤，若為牛馬佢又話勝過雞豚！講到國破家亡將變緬甸，佢又話暫時安樂咯點計得萬載千年？即使妻子被淫、田地被踐，焚佢樓房掘佢祖先，佢亦必定執迷心一便，諉為陰騭叫一句蒼天，好似《紅樓夢》上個位迎春姐，日言感應手庸篇。寄語我地四萬萬同胞須要共勉！唉，物競原精神還要冒險，切莫信渠謬說放失我地個人自由權！

1月12日　辮一個字（其一）　笑罕

辮一個字，提起我就心傷，裝成個鬼樣實在斷人腸！你睇有的打作大松拖在背上，亦有的擯條豆角系咁尺零長，被人恥笑罵佢系烏豬相，佢重搖搖擺擺爛裝腔。試想嚇海亦有咁多人種亦有幾樣，何曾見過呢個野蠻裝？縱使話洋女有時亦同我一樣，但系須眉巾幗豈不羞煞貌堂堂？奉勸我同胞唔使想象，不若把八千煩惱盡地過刀亡！若果話斷發乃系蠻戎和尚妝？更有一言堪做榜樣，你地讀書明理我試共你講句書囊，你睇嚇斷發逃荒宣圣獎，一毛不拔猛譏揚，料必孔子翻生佢亦從眾是尚！唉，唔在想，剪辮為最上，唔信你睇嚇日本如今也去改良！

1月13日　辮一個字（其二）　笑罕

辮一個字，提起我就心悲，再提辮字不覺重凄凄。前者我既把剪辮來勸你地，但未講到其中利害恐怕你地都重唔知，等我再講一番唔怕懺氣。今日閑來無事喜值星期，第一辱國系有時間犯例，個的大頭差役佢就喝住執執哥威，佢重綁作一團牽住你的多辮尾，眼冤到咁你話豈不難為？就系行去行埋多少掉忌，□親臺凳佢就會扯你番嚟。有陣物件玷親佢就揩了落地，打得零星落索呀重慘過五馬分尸。就系日日要走去梳頭咁就夠厭棄，一時唔洗咯佢就會納癡癡。至怕重系個的做工人仔唔留意，癡埋機器咁就任你有翼難飛。有的話擯辮雖則系咁兮剃了又好似系咁勢。有時跌落水咯佢亦易的去施為，有辮就會易撈，無辮就會浸死，但不想嚇辮纏船底呀我問你有計何施？今日我一片苦心來勸你！唉，想起就氣，參透其中旨，若果你話剪辮唔好咯，我就共你死過都唔遲！

1月15日　世事惡解　笑罕

世事惡解，解極我都唔明，做乜我地支那人仔每每被外人輕？我想中國人人都同有一種特性，講到維新經濟佢總總唔聽，大抵舊字入得癥深故把新字詬病，唔除舊念怎樣子見得文明？仕宦途中更易沾染辭癥。競爭場上你話豈免刀兵，革去舊觀方正有進境，昏迷守舊咁就會滅種屠城！唉，難以喚醒，個的守舊更兼奴隸性，重話邊一國為君佢就向一國有情！

1月16日　獅呀你唔好睡住　笑罕

獅呀，我勸你唔好睡住，做乜你睡得咁凄涼？睇見你大夢沉沉，我就實見慘傷，一睡千年幾似死去一樣，點不想嚇你身軀肥大各獸會把你來嘗！舍得話獨處深山我亦由得你睡脹，可奈四邊禽獸眼都光！你地北邊有一只大熊兇惡到怎樣，但磨牙聳鼻屢屢把口來張。狼虎企住在西南如有想象，想擇肥而噬久已利伸長。重有蒼鷹一只高立在個副花旗上，唔聲唔氣我怕佢都會把你來將（借音，讀丁央切）。此外禽獸尚多皆有所想，無非食肉與及拖腸，做乜你鼻鼾還重咁響，原封不動咁就睡在個亞細亞中央？待我大聲來把你叫上！唉，獅呀，你好混賬，快些開眼望，立刻發起個雄威共佢大戰一場！

1月18日　唔好咁懵　何栩然

我勸你唔好咁懵，你重要佢打抽豐？今日人情實與往日不同，往日睇見你地咁斯文故此人地把你敬重，雖系無相不識佢亦格外手頭松，是以往歲個的進士翰林來到走動，莫不荷包豐滿實撈銅。但系事到如今人亦識透你地個擔杠，實乃人情難過佢正把個幾雞來封。至怕重有的不顧交情唔把禮送，佢話你一文不值恐怕你面都紅。況且往者咁多來者又有咁眾，頭湯撈曬就許你拂倒亦唔濃。做乜你時勢不明都重瘟咁戇！南洋咁隔涉虧你也不怕飄蓬。睇你馬褂長衫長日去碰，逢人拜會實在系可憐蟲！重有家用車馬癡去用，跟班一個系咁兩頭香，唔信你個的朱卷幾篇聯扇一捧，大張名片咁就嚇得嚇洋傭。睇見你咁樣子行為真正有用，枉你地翰林進士探花榜眼狀元公，就許你銅臭熏心亦都要知嚇體統，就系面皮唔顧你都要念嚇商窮，今日生意咁艱難人又咁擁，況且里邊個的弗郎賭碼勢色都話唔同，虧你只顧自己貪囊唔怕人地肉痛！星洲到后又話去芙蓉，知你別有一幅心腸咪話被我估中，勢必托言游歷亂噉騙愚蒙！今日我唔怕直言將你動！哎，你真正發夢，共你唔同宗與種，勸你不若回京后補去巴結個的督撫王公！

1月20日　架厘飯　笑罕

架厘飯，撈起在盤間，愁人睇見不覺頓開顏！今日廿世紀風潮如此浩漫，豈敢話食餐洋菜咁就解卻了心煩。但系我別有一種感情生在眼里，等我與君談嚇愿你地莫當為閑！都只為天演競爭真正系可嘆，白憂黃禍久已播在人寰。或者世界將來如此飯，我地黃人勢大不久就會把佢個的白種淘刪。唔信你睇嚇熱氣蒸騰堆滿白燦，結成團體積如山，一落架厘將佢攪反，欲想變翻原色咁就十二分難，故此我睹物思人增浩嘆！唉，心想爛，前程任可恨，但愿我地同胞齊發奮呀，怕乜佢白種咁摧殘！

1月21日　真晦氣　佚名

真系晦氣，撞著個老大宗師，監生唔估有報效嘅名詞，一向秋關來考，試遺才有冇？我未敢半句瑕疵，行運童生，九月還可及第，點想頒行新政，事事離奇。人勸我二百兩銀，咪話唔舍棄，一舉成名天下所知，佢點曉我地讀書人氣味！中秋節近，館谷重未擔嚟，當初悔恨貪名利，如斯巨款，亦枉費心機。意欲問嚇親朋行嚇好事，又怕遺才雖錄，金榜無期。記得舊時主考，幾咁開恩旨，我三場完滿，始買棹回歸，雖則朱衣點顏，本屬非容易，但系門墻得入，亦可光嚇門楣。從今我亦唔希冀，八股燒完策論亦撕！唉，真冇味，不若閂埋書柜去學生意，或者發財有命亦都噲一樣揚眉！

3月1日　門神自嘆　佚名

真正可恨，今日咁依人，總系前世唔修故此罰我守閽。想我態度系咁雍容人品亦不算笨，人人睇見都話我一筆斯文。講到二酉胸藏雖則系冇份，但系文采章身亦可以騙得嚇俗人。天呀，做乜你不許我身進洪門偏要我在呢處門口憑？傍人門戶實在艱辛，講極平等自由都系空過口癮，唔憂唔自立咯總系少埋群。日日要頂硬條腰唔合眼瞓，周年到晚系咁對住諸君，九點收燈人地話歇一陣，我重要關心門扇未敢去行云，絕早又要依樣葫蘆唔敢亂混，朝晚如斯恐怕硬了腳跟。舍得話好似同事個的亞哥我亦唔使怨恨，佢牛高馬大又有甲胄遮身，可奈我弱質書生長袖袞袞，遇著個的野蠻鬼仔我就先怕佢兩三分，就許唔怕大魁身亦帶困。迎來送往又要禮云云，細想嚇籬下寄人都系贃混！唉，心點忿，真正肉緊，待等新正行過好運，或者司閽唔使做咯我便去做個錢神！

3月3日　聲聲話恭喜　佚名

聲聲話恭喜，恭喜在何時？年來喜事說與君知，你睇我地河山原跨大地，北京南粵盡掛龍旗，今日□□咁交關，你話打乜野主意？聽人分則有乜心機，倘若個個都系蠢才，唔怪得你，做乜神明種族，做受陵夷？大地積弊多端非止一事，總唔提起你又唔知，弊在大家忘國恥，丟開公□，只管營私。若系此弊不清，唔駛囗氣，一盆散沙，□怎樣子施為？天咁大個地球，都唔到我地企，萬千恭喜，都系枉費言詞。任你富比石崇無趣味，堆金積玉，也□□人貲。任你福比姬昌生百子，做人牛馬，你話幾咁心悲。睇嚇□太強人，君你要記，趕渠入海，□□肝脾！人話外邦時有的□氣，究竟權強世界，乜想共你講慈悲？今日我黃帝裔孫須要爭一啖氣，破除俗見□□鐵血男兒。雖則系強敵已深，除亦不易，但要齊心去做，亦總唔遲！但怕我志唔堅，不怕佢船炮利！須奮氣，有日復仇還雪恥，我就喜逐顏開，笑面皮！

3月4日　唔好賭　佚名

唔好賭，都要守份為光，新山條路，我勸你莫去流連！如果立心勤且儉，積少成多自有萬萬千。點好妄想橫財，去乘墟四便，荷蘭腳與及寶子件件齊全，莫話得心應手財神現，恐怕贏錢唔到反輸錢，明系坑陷一座人人見，做乜自投羅網咁黑地昏天？重話佢賭碼格外招呼茶酒面，架啡牛奶兼共大口洋煙。即使輸錢亦得快活一遍。誰想食開尋味就噲癡纏，個陣輸到虧空唔得過線，叫幾句傷眼白白望眼天多喊冷！寮□又咁多改變，都系賭之為害苦不堪言。雖則開賭在于柔佛地面，與皇家商務亦不干連，撲火燈蛾又系由自己作賤，并非強迫你去輸錢，總系火車來往咁便，誰人唔想過海就系神仙？聞得今日禁條出有自大憲，坡內四色之人不準去賭錢，第一商家須要行正路個便，第二婦女人家切勿發癲。更有個的工務差人休要錯見免至誤了皇家公務車怕罪相連。唉，的善政頒行真系為大眾起見，各人須改變，凜遵王法樂得合埠安然！

3月7日　真系好笑　佚名

真系好笑，好笑在元宵，本埠原來有俗例一條，一交七點黃昏夕，家家齊把炮仗來燒，有的燒三四五箱唔計得數了，有的全紅數萬高掛在云霄，大約花費百十洋銀唔系少，唔夠一時響喨化作煙消。大抵好勝之心還未了，最怕隔鄰住只把錢（上聲）來凋，雖則慶賀上元也無也乜緊要，究竟傷財無謂重怕事來招，彈著男女往來兼共老少，煙焰迷天阻住大陸一條。既是生意場中非是講小，錢財有用做乜當作無（上聲）用花銷。新正春酒樂得同笑，醉月開筵好過買炮仗燒，實惠同沾快樂不少，勝過嘈完一陣又是明朝。明知習俗難移了，諧談來取笑，不過盡其職任編一個俗話歌謠！

3月9日　醒世解心　佚名

勸你唔好學闊，問你實在有幾多錢？浪子窮途我見過萬千。你祖父一生勤與儉，積些錢財重望你子孝孫賢，你有眼識看，個淫朋來牽引線，一條號路帶你到酒場花天，遇著一個知心嘅繾綣，山盟海誓幾咁纏綿。有陣闊到好似霸王開夜宴，迷香洞里樂境無邊。點估到過眼煙花容易改變，床頭金盡老舉無緣。今日有一種混號鱷魚心陰險，食人唔吐骨實在見牙煙，花酒場中開賭局騙，任你聰明子弟睇佢伎倆唔穿，入佢牢籠真系錯算，總有銅山金穴立地輸完，賭債難償還勒寫券，賣埋大廈又鬻盡良田，個陣衣服不周人地厭賤，親朋借貸不敢開言，往日做乜咁輝煌今日做乜咁靦腆？唉，須要檢點，擇友親良善，但凡嫖賭切莫流連！

3月10日　唉真正丑咯　佚名

唉，真正丑咯，你話點樣子遮羞，縮埋一便總系唔敢當頭。你睇東三省事情，日本幾咁得手，不過系區區三島，都重回學恥尋仇，轟爛俄國幾只戰船，趕到佢無路走，重要整齊軍備，打佢出大東溝。我地正好趁哩個時機，幫助日本打斗，況且個虎狼俄國，共我有海樣深仇，往日被佢百種欺凌，無可奈何都忍受，做乜今日有人替我出力，我重一味縮尾藏頭？今日咁樣嘅行為，夸乜野大口？重好講話文明古國，禹域神州？你睇富國的大員，一味噲辦哞，亦有強兵坐擁，幾系咁優游，平日籌餉練兵，似乎都幾講究。做乜臨時觀望，總冇到機謀？怪不得各國人民，將我地睇透，話我系血涼動物，蠢似猿猴！唉，真至哞豆，從此國威名譽呀，付去水東流！

3月14日　咁嬲沙　佚名

因乜野事，攪得咁樣子嬲沙？唉，官呀，你呢回做事咯，委實加拿，你睇市面嘅情形，天咁高價，都只為厘金太重，迫住要起勢嚟加。但雖則有本經商亦都唔系大把，點怪得佢有加無減咯，咬實棚牙。我估話個的官場，都知嚇得，或者關心民事，會救嚇人家。點知個個無橋梁，埋關抽稅喇，就曉得嚟查，聯想廣西鬧出件新聞話，個處忽然走出只大生蝦，貨物抽厘聽見鬼怕，兩宗柴米呀，越發骨肉都發麻。大道生財還有吉卦，人頭抽稅正系食骨吞渣，激起商人將市罷，人情洶洶咯，吵到官衙。我想時世系咁艱難，官又奸詐，冇乜心機嚟睇世界花花！官呀，你睇地皮真正凹下，須顧嚇，咪攪得饑荒成禍，世亂為麻！

3月18日　唔在咁閉翳　佚名

你唔在咁閉翳，勿怨話運蹇與時低！我想人世的窮通，都冇乜定例，一時運轉，便立判云泥。你睇老周佢噉多錢，難道我就窮了一世？論來才干亦有甚高低，不過佢的運紅，就得咁架勢？時來頑鐵亦噲生輝，唔信你睇今日的山票，唔怪得話遏制，一錢博萬滿載而歸，月月都有人同佢兜偈，但求有些運氣，便撈了過嚟！你看茶館個個企堂，窮了半世，忽然財撈數萬，佢反應冇處來劑。更有城內個煙精窮似鬼，求神唔買，十三字嚟齊，估話今生注定窮到底，點想前回走寶，后會又翻嚟，轉眼貧窮成了富貴，都為時運催人就噲發威。就算未必人人能撈得大偈，得些小彩，亦有救嚇目前危。況且錢不在多，惟在夠駛，但求衣食兩無虧。若系講到錢多，誰似李世桂，做乜一時倒運便賤如泥？認得佢為侵吞個的緝捕經費，致令監押不得回歸！若再審實佢科場來舞弊，更妨去了個個食飯東西，都為佢食得無厭招閉翳，反不若小小人家，尚不致吃虧。就算個的橫財，唔聽我駛，唔通兩餐茶飯都揾唔嚟？罷咯，不若隨遇而安混過一世，休作千年計！安步當車，無罪富貴，個的正系人真樂。反怕你做唔嚟！

3月22日　須務正業　佚名

須務嚇正業，莫個佢望個的橫財，守分營生理系本該，大抵賭博好似一口花針沉在大海，思量撈起，你話幾咁癡呆！闈姓叫做賭得斯文，似系無甚大害，近來個宗賭棍，又會設法抬杠。此外票債雖多，亦難以獲彩。就系番攤容易中寶，你見變革得寶歸來？總系個李相鴻章貪了貨賄，賭博準佢承商，種下個的禍胎！個個想望個的偏財來自意外，累到傾家失業，尚未意轉心回！他日佢的臭名流到萬載，生平功業盡化塵埃。今日大吏知道駭人思想改變，但系款難籌補，故此賭餉難裁。奉勸賭仔回頭須自愛，貧要忍耐，你試問力唔辛苦點博得個的世間財？

3月24日　食生菜　佚名

好大生仔嘅引，做乜揾仔要去官窯？你睇年年個生菜會，都系大開銷。自古話冇仔就住在狗欄，都唔算系妙。若系憑神保護委實無聊。我話男女講嚇衛生唔怕個肚有料，但得室家和好，就系有無兒女亦命里當招。冇話取嚇食生菜意頭，即刻就噲生個大少。做乜要走去山頭兀地咁無聊？佢重點起個送子燈籠，隨路咁照，神紅一幅札住個只元豬腰。我想婦女之家，都話唔好去入廟，況且出來求仔你話幾咁招搖！更怕生菜食得過多唔得穩妙，寒涼虛弱反咬把經調。大抵生仔不是尋常，凡事亦有個湊竅，或者今年食過，亦噲碰著有仔洗三朝。若話唔去食過就冇有仔生，就系呆得好笑！唉，唔得了，重要下回去那個睡佛，更重睇見佢赤體條條！

3月25日　唔舍得你　佚名

我唔舍得你咯，我死哩亦要同你共埋，唉，妻呀，點解我八字成得咁命乖！想我往日做官，唔系劣曬，就系殃民作惡點似個個大煙裴，或者有的唔啱官你亦都唔好見怪。就系唔留情咯，你亦要念嚇我往日當差，點估革了功名，還要遞解，軍臺效力呀，叫我點樣嚟捱？呢陣插翼難飛，還不了孽債。重怕殘年唔保，命喪塵埃，咁就塵埃，咁就無主嘅孤魂，流落異塞，無親無故，有邊個收拾尸骸？今日生死嘅關頭，我亦都唔計帶，總系心肝命訂，點樣舍得裙釵？我今日上稟求情，話要回個賤內，得佢量情批準咯，確系遂我心懷！雖則我系犯官，無乜野世界，總系同衾同穴，亦要白首相偕。我亦把心事解開，唔駛掛帶！唔掛帶，等到公文嚟到喇，我地就雙攜玉手走到天涯！

3月28日　新山賭害　賭國冷眼人

真拼爛，個個都話去嚇新山。你睇個的賭徒猖獗，勢若狂瀾，賭碼乜咁迷人！所為個種招呼的確系贊（上聲），點心茶飯，一日都講話幾多餐。房□咁好鐵床，兼共上氈下毯，自由出入，總有關闌。男客若系星君，隨便邀老舉到嘆，買埋鮑參翅肚，佢重逐日出新菜單。三鞭酒第一壯陽，問你平日曾否飲慣？重有沉油頂舊，挑幾口俾過你頑頑。若系女客到來，更重唔敢怠慢，場中聽用，另外使婆（上聲）成班，你要洗面與及梳頭，一一同你打扮。飲醉三杯和兩盞，小心留意，都噲共你收拾釵環。男女同一窯人，大抵都系好人有限，風流快活，不知在天上人間。個的絲竹管弦，無分期共晚，知音人遇，又只管女唱男彈。嘆罷或打寶與及紙牌，睇爾好去聲門邊一掰？推完牌九，又去買下番攤，爾身上帶有八千，還是一萬，輸干為止，誓冇俾而捧璧歸還，任爾痛哭秦廷，亦系空手便返！若系搬兵來賭過咯，至好爾大注孤番。點想買一闐三，輸到斬斬嚇雙眼，個陣山窮水盡，問你幾咁苦楚艱難。自古道貪字變貧，唔信就噲撞板，無門生借，點樣打得新聞！唉，容乜易散，面皮都抓爛，重怕女人失節，就噲壯士無顏！

3月29日　被拐自嘆　佚名

真正恨惜錯，實在見心嬲，石腳墻邊正好坎頭，當初只為難糊口，并且好閑學懶，冇地求搜，遇著個個奸人將我計誘，甜言蜜語把我收留，但話今日有好路一條同我去走，代謀生計免使我擔憂，重話帶我去到外洋，工價更厚。況且辛苦全無事事自由，去撈幾年財發到手，榮歸滿載可以樂享無憂。點估落到船嚟還賤過狗，藏埋暗處賣往他洲，個的園主各人來買售，帶我番去園林當作馬牛。大病臨身唔到你顫抖，一時歇手就把亂鞭抽，苦楚萬般難以抵受，個陣要生唔得死日臨頭，舊日同來今日亡去八九，欲還鄉并只可向夢中求！勸你地大眾同胞唔好學我咁哞，須想透，若然唔醒定，就噲墜入佢的奸謀！

4月25日　咁淡定　佚名

乜你咁淡定，總不見你擔愁，你睇日俄開戰，都系想把東省來收，勢唔估你闊佬拘偏肯袖手，況且占你發祥之地咯，亦都要紀念嚇個點冤仇！平日你話共佢聯盟點解佢又唔幫你手？噉就屯兵不撤，騙得你口水流流。故此日本□來，更防佢撈埋高麗個臼，登時火滾喇，勢不共佢干休！你又想嚇東三省既入俄國口中，點肯俾你嚟挖翻出口？恐怕兩家唔肯下氣，就噲試嚇拳頭。這個話要占京城，那個又話要同你代守，你睇嚇旌旗戰艦，塞滿個大東溝。個陣炮火連天，問你誰一個擋受？你縱無兵力，亦該要出嚇機謀，重怕佢兩個打到眼花，唔顧得你個母后？咁就將北京城座變做佢地嘅八大碗珍饈！萬一燒了頤和園嘅老鴉竇，又怕五更溜路咯，豆粥難求！呢陣唔似聯軍舊時，猶有挽救，一定瓜分魚爛啫，你話著乜來由？我勸你的紅頂白須，唔好咁哞豆，就算虎頭蛇尾，亦要頂硬幾句京喉！今日事到臨頭，亦知你機器唔夠！唉，須想透，切勿顧前唔顧后，就系暫時中立咯，亦怕你唔做得幾耐優游！

5月7日　唔使問亞貴　佚名

唔使問亞貴，貴極都系參游，想起前事番來叫我怎不羞！想我自小在家游蕩日久，故此見軍營一走就把官位來謀。想我咁曉鉆營又噲籠絡得透，歷案升為參將喇，估話一世永遠無憂！撞著攤館個頂賭場承了餉后，把權利全盆歸我咯你話幾咁優游！我重估打過呢個算盤無乜錯漏，乘機想計把佢暗地來抽，唔想激起街坊眾怒把我來歸咎，白抄齊貼咯唔知共佢有乜冤仇？重話借餉謀財我原系禍首，眾人入稟共我誓不干休！大吏就叫廣協把我生擒委實系丑，個陣叫官員看管咯，好似入了羈囚。重叫我將四十萬繳完才肯赦宥，咁就查抄家產重波累及個的兄弟朋儔，唔想有咁樣風流有咁樣罪受！人地話我貫盈罪惡故此天怒人嬲！唉，真系無可救，望財神嚟保佑，等我脫離災難咯再把恩酬！

5月10日　怕乜野好看管　佚名

怕乜野好看管，總要我地神通，唔系歸山老虎哩，定系出海蛟龍。當日任得佢查抄，非系我懵，一面鉆營佢去緊一面打算來松。若系鉆到唔鉆得嚟，才至去郁動，靠住個煙屎同僚，叫做扭計祖宗，唔信你睇嚇邊幾位紅員，肯擔保佢咁重？帶歇埋我老李咯，委系依樣通融！記得個日點抄衣物，開到個皮衣杠，怕我皮袍冇件哩，不久就噲番風，我個陣委實領佢好心，總系憐佢大懵。外埠邊一處銀行有我老李個祖宗，若系我地三小姐計埋真嚇壞你大眾！人話咁多私己應份手頭松，今日十萬頭買所洋行唔算浪用，重要去東華醫院把紳士來充。聽見話木排頭個座新屋昨日人擠擁，有兩位同寅拜送呀，怪我走得倥傯。若系眾位同寅要來港補送，咁就話父連，英語好朋友之稱。講句話，多謝你救出牢籠！

1905年

2月27日　明知道系錯　冷眼生

明知道系錯，未必重想佢聯俄，謀人國事計何疏，引火燒身原系自己作禍，將人比物你都莫笑個只燈蛾。東三省事情人盡見過，問誰啟釁致動干戈？開口講話靠人原屬不可，主權盡失所以誤卻支那！你睇列國同盟邊個系衛我？況且俄人橫暴欺藐尤多，如此漢奸天呀你應要折墮！一言為定被佢賣了山河，瓜分已種他年果。被佢春來醞釀更易成坡，記得西匪猖狂佢又求法佽助，春猶言蠢憤做亞庚！哥呀，真和（上聲）妥，怪不得黨人來動火，我想鑄個福華真像當作頂禮彌陀！

2月14日　除去了鴉片（解心）　佚名

除去了鴉片，重有邊樣解得人愁？執住呢半竽崖竹，免卻煩憂。人地話世界要維新，我話煙界要舊。第一數十年膠土更妙哉沉油，對住個盞油燈，燒到透，馨香奇味，治得百病全瘳此物既可消囗，又除得疾疚，世人唔嗜好，真系笨如牛。曲睡煙床，昏了晝夜，任得興衰成敗，亦忘憂。日與芙蓉仙子，為朋友，勝似終朝勞碌，把利名求體質煉似仙形，唔怕太瘦，就系縮腮尖嘴，亦妄不知羞。煙霞煙霧，凌霄斗，他日煙界成功，總勝你一籌。唔信試睇嚇我地四萬萬同胞，有大半被煙浸透。呢一件叫做群行義務，大約致死唔取，每每聽見話明日戒三個字慣談，常出口，大抵實在與芙蓉割愛，似屬虛浮，誓不肯拋離，槍與斗，煙云迷漫，死日方休。亦不懼煙名傳播，揚寰宙。又唔怕身為煙困，冇日優游。此孽正系自招，還自受，反自為榮，與倍幽，恐怕有日槍塞油干，煙又唔入口。唉，知弊陋，家產成烏有，個陣欲死無繩，問你點樣吊喉？

4月3日　酬勝燈（解心）

洪圣寶誕，實在見心憂。記得去年今日，把勝燈投，只估話投得此燈，名利兩就，發彩生仔，樂無休！故此價錢標起，相爭斗，洋洋得意，轉回頭，癡心滿望，神靈佑！恃在勝燈條路，興偏幽，況且一片誠心，唔系假柳，自然獲福快活優游！點想運蹇時乖，難應手，依然故我，實堪羞！轉眼又到二月十三，唔系久，呢陣重要多挪借，去把神酬。棚金無助，更有果品三牲，酒數甌。可恨司祝佢尚唔知，我辛苦到彀，重話我今日還神勝意咯，要助一份大香油，虧我好似啞子嚼食黃連，難以出口，只有滿腔愁恨，在暗中取。又點好話開聲，埋怨木偶，只悔自作無知，妄把福求！奉勸你地眾人，唔好咁吽，把個種迷信心腸早日罷休，勿信話偶像可能，將你護佑，枉把錢財虛耗，著乜來由？愿你把迷信關頭，參到透，各自經營，實業去修，現在時勢咁艱難，你地曾知道否？唉，休落后，要把精神當振抖，切勿把鬼神兩個字啫，掛在心頭！