二 檳城新報

1905年

4月12日　容乜易（解心）　佚名

容乜易謝，一朵鮮花，供人賞玩。過眼繁華，咪話琵琶門巷，你心常掛，辱沒聲名，害了自家。風月場中原系假，溫柔鄉里，好比露水煙霞，斷無真淚，向君前灑。朝秦暮楚，賤比婁豭。雖則風流杜牧，傳佳話，只恐潯陽江外，無比抱恨琵琶！一入迷津，難以點化，進此關頭，一念就差。任得你周身銅鐵打，睇見筵前花柳，眼目俱麻，歌喉檀板，音清雅，迷魂蕩魄更有的小花娃。美人關跳不出，英雄駕，害到傾完產業，冇乜揸拿？重恐斬宗絕嗣，丟清駕，悔恨嫌遲，苦惱倍加！何不及早回頭，來挽駕，把章臺飛絮，視作過眼煙云，緊系心猿意馬，莫學翩翩浪蝶，亂性迷花！但向色字源頭，查察嚇，利刀真可怕，不若學嚇魯男柳下，美玉無瑕！

4月13日　容乜易（解心）　佚名

容乜易醉，酒于盅，性耽沉湎，豈是英雄？雖則消愁解悶春頭甕，但系腐腸之藥勿當輕松！酒能亂性，噲把殘生送，恃酒胡為就噲大禍相逢。一時性起稱驍勇，尋端啟釁就行兇，一朝酒醒如春夢，追悔難翻靡窮。試問酒囊滿腹終何用，不明世務似癡翁。愿君戒脫勿要貪杯弄，勿話金貂可換，又試扶筇。重怕玉山傾倒一陣寒風送，采薪無力重要藥物相攻！我想七尺身軀何等貴重？豈可無端糟蹋，當作斷梗飄蓬？我想夷狄不仁來作俑，故此禹王厭惡，視等梟兇，俚歌一曲將言奉，君記取，切勿醉鄉迷戀，自閑樊籠！

4月17日　聞得爾起解咯　佚名

犯官裴景福起解戍新疆。

聞得爾話起解咯，我都為爾心開。新疆超度好比一個佛界如來，堪笑粵人憤恨，欲把爾頭顱改，想起番嚟，都算為你擋災。今日大吏開恩，真系好彩，一條狗命，噉就發遣軍臺。爾執定個碌煙槍，和共鋪蓋，免至臨時煙癮，眼淚盈腮。爾睇派出兩個解官，原屬至愛，前途保重，也不枉你運動多財。況且新疆遇著個藩臺，又系吳氏所在，呢賬知己情殷，保護本該。造乜汝個煙精，錢術得咁利害！待等到罪名開脫，或者唎噲復任榮回！呢陣你快快起程，唔在久耐！唉，粵人真氣晦，煙裴無可奈，嘆一句貪官污吏呀，爾地地皮唔鏟又何呆！

4月19日　唔好發夢　醒焉

勸你唔好發夢，終日系咁昏蒙，邊一日正得你醒起夢中？危亡兩字豈有心唔痛！但系話一便臥薪嘗膽，一便系咁從容！你睇時事系咁艱難，人重咁懵懂，一味韶光且過，重去弄月嘲風，時事緘口不談，方叫做慎重，有人講嚇，就話佢發瘟蟲！個的做官嘅人，多系古董，只好大家咪理，詐作癡聾！個的有志嘅人，都頗知奮勇，總系有心無力，系咐拍手空空。若不真正振作起嚟，就新都冇用！唉，愁萬種，何日睡獅才醒，振起在亞洲東？

4月22日　新聞紙　醒焉

新聞紙，系一位名師，開人智慧，實在新奇！各國新聞與及中國近事，世情物理，樣樣都知。學問上頭，添幾多妙理；商情里面，越發得便宜。正系無論官商與及士廣人人都有益智，真系一國生機。有個話的新聞，乃系亂諦，一味發橫議論，實在無稽。我話個個人真正不通到極地，唔知時事，重慘過發昏迷。總系報館有咁多，唔知邊一份好睇？時須要念嚇，國內基危。我地唔得文明，因乜野事？都因愚蠢，所以進步得咁遲！二十個行埋，九個唔多識字，原無教育，點怨得志氣頹卑！想要開化國民，總要淺字過底，唔好話廢言都有味，咪當佢紙上空談，做一段笑話為題。

4月28日　時一個字（解心）　佚名

時一個字，觸起時思，正系今時，非比昔年時，為甚時人，總不知時事，重要把時候耽延！怎樣設施，你睇時局咁艱難，真正系不易！未曉開通風氣，究竟在何時？時光迅速，如流水，恐把歲月負卻，就噲鬢發如絲。人生總要，知時理，勿話野蠻腐敗，不合時宜，青年時節，莫負凌云志，就系老年時日，亦要知機。你話不憂時勢，大約非同類。但重時圖一覺，詐作癡愚，實恐時衰運敗，爬唔起，臨時苦惱，自傷悲！現時未晚，趁早開風氣，愿你識時俊杰，萬勿耽遲！時務文明，唔系惡事，流通智慧，達透時規，就把時藝當心，常謹記，時刻留神，莫出教育范圍，個陣翻新時局，諸般美！但望聰明時士，特別心機，一定公益時權，兼利益！唉，時不敝，但愿乘時起，咁就四時歡悅唎，勿錯過了時期！

5月15日　和尚陳情　佚名

發財如果咁易，重駛乜去趁金山？提到佛門兩字，點好把來頑！雖則學堂要開，唔準懶慢，但務餓瘦個班和尚，問你點咁歡顏？況且被汝唱破神權，錢又有贃，經資無靠唎，日日系咁安閑！我地黑米，既要燒灰，白米，又要弄飯，重有尼姑媽姐，累我破嚇囊慳，百賬揾咁開銷，全仗寺產，被人提去，實在性命交關！唉，天有眼，挽回今未晚，得老佛爺爺一笑咯，咁就彌天風雨，冇點波瀾！

5月29日　又和尚陳情　佚名

天容我輩，點綴嚇環球？和尚清閑，福澤較優。你睇儒要讀書，工要動手，農夫播種喇，商賈又苦持籌，重有個的負販肩挑牛馬走，披星戴月未曾休。獨系我地不織不耕安享受，叢林深坐，號做緇流，閑或念經開嚇口，托名施佛，便有貨來兜。大抵時節色色形形都要有，若把僧尼沙汰，衣缽誰留？今日寺產免提真福厚，感懷慈佛佑，保穩們溫飽呀，再講清修！

6月24日　車仔佬　笑侃

車仔佬，睇見你我就心嬲！大抵你特質生成要做外國嘅馬牛，我想華人叫你未必無錢逗，做乜叫盡多回你總總不□（平聲）？有陣講句圓融還重推去手夠，有陣裝聾作啞爾重走去別方梟（借用，無區切）。乜事一見洋人爾就迎著去走？瘟咁匿梳亞四擘破個嚨喉。人地闊佬唔聲當作爾系吠狗，爾重奴顏婢膝密咁老兜。拖著個的大孔嘅亞端我重唔笑爾吽，拖著個的飲醉洋兵我實在替你愁，問佢討錢佢又醉酒，喝聲葛點佢就轆起個對藍眸。若果大膽哺佢一聲來共拒斗，佢重當頭一棒打得爾眼水流流，或者火腿面包監爾領受，叫馬打唔應只得急把身抽。細想嚇爾咁樣子做人真正亞茂！唉，須想透，愿汝從今后，換轉個一幅媚外心腸咪咁燦頭！

6月30日　唔系計　佚名

前署茂名縣俞人鏡，前署增城縣劉寰鎮，前署南雄州德馨，岑督將其撤任查辦，今盡逃去矣。岑聞之，異常憤怒，現已分飭查究，然亦奈之何哉！

想到唔系計，正共你離開，聞君呢陣，記恨在心來。咁好煙花，我情愿割愛，按嚇心頭，亦系好哀！第一君最無情，第二奴似有罪。我系一條薄命，自問死得幾多回？我去后望君，你情性變改，或者再能相見，彼此認句唔該。總系世事幾番，又怕你唔等得咁耐！唉，無可奈，我見姊妹好多因擬累，所以自家唔肯，學得咁癡呆！

7月5日　國勢日蹙　佚名

上海中外報云，江寧藩臺黃花農頃據海州王牧稟報，上月某日，忽有德兵艦四艘，碇青口洋面，德兵三十名，均已登岸駐扎云。

國勢日蹙，君呀，重有乜法子維持？睇嚇人地似虎如狼，我地好像雌伏，任佢東屠西割，豈復言公理！只怕佢要索無厭，我的土地有盡時，各國以均勢為詞，就何所底止？正系如攜如取，個陣五裂四分，無乜顧忌，就系剩山殘水，重有乜孑遺？君呀，應念數千載嘅固有封疆，歷久本無乜變置，正系宗綿祖蔭，生長于斯，一旦入了外界輿圖，風景頓異，往日黃纛飄揚，呢嚇換轉別樣旗，想到咁樣子情形，唔忍眼視！唉，真慘事，勸君唔好咁放棄，舍得個個同心戮力呀，未必國運整到咁陵夷！

7月13日　真正不便　亦愚

真正不便，食著個口洋煙，明知死路，乜重死得咁心甜。君自上癮到而今，容貌盡變，皮黃骨瘦，重聳起雙肩。日日執住煙槍，料你無乜政見，再多爪牙，看嚇百足個條辮，大抵斗靚煙濃，君亦幾贊羨！有時挨癮，怕你口鼻流涎，或者公二開燈，都可消嚇念。但系屎都要食，你話幾咁心酸！睇你睡夢系咁迷，呼喚不轉，唔信大丹煉就，就噲白日飛仙！重有欲淡精寒，未必再好個件，麟兒縱產，亦怕黑種相傳。今日世界系噉野蠻，都算系極點。做乜噉深黃禍，重要黑禍相兼。煙海茫茫，勸爾休要眷戀，情根須斬斷！我想在煙波里頭，放下一只救生船！

8月28日　花有恨（傷美人之薄命也）　黃郎

花有恨，惱人腸，人比花殘也覺可傷！記得春暖芳園，花貌幾咁旺暢，造乜秋風涼到，花葉又咁樣子飄揚？想必花神懶護，至把花心愴！花落無言，我問你有乜主張？未必有個黛玉多情，來共你奠葬。太息一場風雨，世態炎涼，花事如此無情，人事都系如此著想，絕世花容，你話有幾耐嘅色香！就算你好極好過牡丹，都系春景一帳，留春不住，重有乜排場？況且惜花人仔，大半癡蠻漢，有陣蹂躪花叢，反惹禍殃。人地話薄命紅顏，偷自怨唱，講到填還花債，唔知誤盡多少嬌娘？罷咯，不若進步文明，舉嚇獨立的氣象，女界萌芽，咪個任佢折觴！明亦知苒弱韶光，無乜力量，總系情根看破，那堪恨短和長！唉，世界花花樣，色即成空相，恨只恨花王圈制咯，自當改革從良！

9月2日　秋后熱（解心）　佚名

秋后熱，更難當，逼人秋景，倍覺彷徨。你睇無風野樹，蟬初唱。晚霞紅映，滿庭芳，西風蕭颯，令我增惆悵。雁聲嘹亮，五更寒，呢陣縱熱極亦無多。君呀，你須要自量，要把熱誠在抱，勿負韶光，切勿恃住有熱無寒，個個心就放蕩。若系把天時睇錯，咐就實惡商量。今日聽見個種熱膽血心，無個不講，但須要始終如月一，切勿話參商，恐怕你一杯秋風颯體，就把志氣來吹蕩。又似寒蟬噤口，問你點樣子登場？秋思系咁撩人，魂都噲喪。又恐惹人昏睡，日在黑甜鄉。人話每到秋來，天色最爽，我話秋來蕭索，愈覺凄涼。我但望你地個一片熱心，無乜別向，縱有朔風嚴厲，亦吹不轉個副熱心肝！我想人無白載，猶強壯，蜉蝣暫寄，不過數十年長，名譽流傳，方不枉，叫你腐同草木，怎不傷心！唉，情可愴，往事何堪講，但祝前途發達，入廿世紀稱強！

9月14日　中秋月（解心）　韋大郎

是夜暴雨如注。

中秋月，分外清明。月呀，你體質本系文明萬國所稱，話你有有有唐皇幸，想見當時簫鼓共慶升平，今日家家議就把你來恭敬，話系象垂妃后呀一味太陰星，不想月體象陰就噲引起陰霾眚，蠻云乍掩咯你便失卻光榮。細想你位置雖高究竟系陽剛不競，故似小人驟變咯，你就沒法懲膺。唔信你看嚇庚子個時端剛亂政，妖氛陡起嚟，就系月你失勢潛行。舍得你能自保界限永圓，我亦話你系神圣。總為你月體不得無虧，就要讓旭日東升！唉，須自醒，天道常傾盛！月呀，爾勿待蟾蜍食盡咯，轉令愛爾者傷情！