讓菜鳥飛翔～

話說某日返返嚇工，收到條咁嘅Whatsapp：“放工得閒打畀我，有嘢講。”

呢個情況，就好似阿媽突然話：“阿仔，你過一過嚟，有嘢問你。”我心諗：今次又想話我做錯啲咩呢？Any肥，直覺話我知，件事應該無咁簡單。於是，我收工嘅時候，用如臨大敵嘅心態，撥出一個熟悉嘅電話號碼，踏上一條未知嘅前路……

“臣麥仔向女王陛下請安！”

“有件事要你幫手。”電話另一邊嘅港女友直截了當咁話。

“未知咁夜召見在下所為何事呢？”我懶係恭敬咁問。

“幫我寫序得唔得？”

中學之後，我都好少正正經經咁寫一篇文。寫序？直頭寫都未寫過！而當我知道要寫呢本書嘅序嘅時候，其實我係（諗過）拒絕嘅！因為我覺得，你唔能夠叫我寫就馬上寫……況且，向來喜歡突破盲腸嘅我都好清楚，雖然我係港女友嘅“靈感男神/臣”，但講到寫序？輪都未輪到我啦！一睇就知我係後備/次選/備胎/替補……但我亦都知道，如果我“抗旨”，咁我嚟緊嘅日子將會“性命堪虞”……所以，我呢位“情感嘅正選，寫序嘅後備”，決定盡下人事發揮小宇宙。

老實講，港女友當初興致勃勃咁話要喺社交平臺寫文，我見佢呢個奄尖腥悶嘅“港女人”，咁難得搵到想做嘅事，點可以唔支持呀？但你問我有無諗過佢會寫文寫到出書？好坦白咁講，唔止係我，連佢自己都無諗過。畢竟，佢都只係寫咗無耐，作為寫作界嘅菜鳥，原先都有諗過：呢個機會，會唔會係伏嚟?？但諗返起港女友每次同我分享讀者留言同inbox搵佢傾心事嗰個樣，我就知道佢應該要試一次！反正一隻菜鳥最大嘅本錢，就係佢無嘢好輸。如果最尾反應真係唔好嘅，最多咪做返鍵盤戰士～

同愛情一樣，試過，就算最後結果係唔得，至少都心甘命抵。其實我哋每個人，都係從零開始，踏上每個未知嘅旅程。無人知前面會係點，但就係因為唔知，先可以創造同發掘到一個又一個驚喜時刻。菜鳥能夠飛翔，都係因為佢肯踏出第一步。所以我一直相信，菜鳥都可以變大師，後備都可以係MVP。

至於邊個係我嘅MVP？你而家咪睇緊佢本書囉！

by麥仔